പാസ്സിങ്ങ് ഔട്ട് പരേഡ്

               പൊയ്‌ക ഗവ ഹൈസ്‌കൂളിലെ സ്റ്റുഡന്റ് പോലീസ് സീനിയര്‍ ബാച്ചിന്റെ പാസ്സിങ്ങ് ഔട്ട് പരേഡ് ഫെബ്രുവരി 28ന് വൈകിട്ട് നാലരക്ക് കോതമംഗലം മാര്‍ ബേസില്‍ സ്‌കൂളില്‍ നടന്നു. ബഹു കോതമംഗലം എം എല്‍ എ ശ്രീ ആന്റണി ജോണ്‍ പരേഡ് സല്യൂട്ട് സ്വീകരിച്ചു. മികച്ച പരേഡ് നടത്തിയ കേഡറ്റുകള്‍ക്കുള്ള പുരസ്‌കാരം പൊയ്‌ക സ്കൂളിലെ വിദ്യാര്‍ഥികള്‍ക്ക് ലഭിച്ചു. സ്റ്റുഡന്റ് പോലീസ് ഉന്നതോദ്യോഗസ്ഥരും മാര്‍ ബേസില്‍ സ്കൂള്‍ മാനേജര്‍, രണ്ട് വിദ്യാലയങ്ങളിലെ പ്രധാനാധ്യാപകരും രക്ഷകര്‍ത്താക്കളും അധ്യാപകരും നിരവധി വിദ്യാര്‍ഥികളും ചടങ്ങില്‍ പങ്കെടുത്തു

SPC നേച്ചര്‍ ക്യാമ്പ്

      പൊയ്‌ക ഗവ ഹൈസ്‌കൂളിലെ സ്റ്റുഡന്റ് പോലീസ് കേഡറ്റ് വിദ്യാര്‍ഥികളുടെ ഈ വര്‍ഷത്തെ നേച്ചര്‍ ക്യാമ്പ് മൂന്നാര്‍ ഇരവികുളത്ത് ഫെബ്രുവരി 20,21,22 തീയതികളില്‍ നടക്കുന്നു. ഒമ്പതാം ക്ലാസിലെ 43 കുട്ടികള്‍ പങ്കെടുക്കുന്ന ക്യാമ്പിന് എസ് പി സി എറണാകുളം റൂറല്‍ സെല്ലിനോടൊപ്പം സ്കൂളിലെ എസ് പി സി ചുമതലയുള്ള അധ്യാപകരായ ശ്രീ അജിത് സാര്‍, ജിജിമോള്‍ ടീച്ചര്‍ എന്നിവരോടൊപ്പം ശ്രീ ബിനുകുമാര്‍ സാര്‍, ശ്രീമതി സുഷമ ടീച്ചര്‍ എന്നിവരും പങ്കെടുക്കുന്നു. വിവിധ വിഷയങ്ങളിലെ ക്ലാസുകളും പ്രകൃതി പഠനവുമാണ് ക്യാമ്പിന്റെ ആകര്‍ഷണം

SPC രക്ഷകര്‍തൃയോഗം

      ഈ വര്‍ഷത്തെ സ്റ്റുഡന്റ് പോലീസ് കേഡറ്റുകളുടെ നേച്ചര്‍ ക്യാമ്പ് ഫെബ്രുവരി 20,21,22 തീയതികളില്‍ ഇരവികുളം ദേശീയോദ്യാനത്തിലേക്ക് നടത്താന്‍ നിശ്ചയിച്ചിരിക്കുന്ന സാഹചര്യത്തില്‍ SPC രക്ഷകര്‍ത്താക്കളുടെ യോഗം ഫെബ്രുവരി 15ന് രാവിലെ സ്കൂളില്‍ നടന്നു. PTA പ്രസിഡന്റ് ശ്രീ കെ എം ഹസൈനാര്‍, പ്രധാനാധ്യാപകന്‍ ശ്രീ സുജിത്ത് എന്നിവരുടെ സാന്നിധ്യത്തില്‍ നടന്ന യോഗത്തില്‍ SPC ചുമതലയുള്ള അധ്യാപിക ശ്രീമതി ജിജിമോള്‍ ടീച്ചര്‍ ആവശ്യമായ നിര്‍ദ്ദേശങ്ങള്‍ നല്‍കി. ഈ വര്‍ഷത്തെ കുട്ടികളുടെ പാസ്സിങ്ങ് ഔട്ട് പരേഡ് കോതമംഗലം മാര്‍ ബേസില്‍ സ്കൂളിലാവും നടക്കുകയെന്നും യോഗത്തെ അറിയിച്ചു.

ആതിരപ്പള്ളിയിലേക്ക് വിനോദയാത്ര

പൊയ്‌ക ഗവ ഹൈസ്‌കൂളിലെ ഒന്ന് മുതല്‍ ഒമ്പത് വരെ ക്ലാസുകളിലെ കുട്ടികളെ പങ്കെടുപ്പിച്ച് ആതിരപ്പള്ളി ഡ്രീം വേള്‍ഡിലേക്ക് വിനോദയാത്ര ഫെബ്രുവരി 15ന് സംഘടിപ്പിച്ചു. വിവിധ ക്ലാസുകളില്‍ നിന്നായി നിരവധി കുട്ടികള്‍ പങ്കെടുത്ത യാത്രയില്‍ കുട്ടികളോടൊപ്പം അധ്യാപകരും പങ്കെടുത്തു.

കൃതി 2019

വിദ്യാര്‍ഥികളുടെ വായനാശീലത്തെ പരിപോഷിപ്പിക്കുക എന്ന ലക്ഷ്യത്തോടെ സഹകരണവകുപ്പിന്റെ സഹായത്തോടെ പുസ്തകങ്ങള്‍ സൗജന്യമായി നല്‍കുന്ന പദ്ധതിയാണ് കൃതി 2019. അക്ഷരലോകത്തേക്കൊരു സഹകരണയാത്ര എന്ന പേരില്‍ ഇടമലയാര്‍ സര്‍വീസ് സഹകരണബാങ്ക് നല്‍കിയ 4000 രൂപയുടെ പുസ്തക കൂപ്പണുമായി പൊയ്‌ക ഗവ ഹൈസ്കൂളിലെ വിദ്യാര്‍ഥികളും അധ്യാപകരും അന്താരാഷ്ട്ര പുസ്‌തകമേള നടക്കുന്ന മറൈന്‍ ഡ്രൈവില്‍ 15ന് സന്ദര്‍ശിച്ചു.ള്രീ ബിനുകുമാര്‍, ശ്രീ അജിത്ത് ഇ കെ, ശ്രീമതി സിജിന വി എസ് എന്നീ അധ്യാപകരുടെ നേതൃത്വത്തില്‍ 25 വിദ്യാര്‍ഥികളാണ് മേള സന്ദര്‍ശിച്ച് പുസ്തകങ്ങള്‍ തിരഞ്ഞെടുത്തത്. സൗജന്യകൂപ്പണുകള്‍ നല്‍കി ഇതിന് അവസരം തന്ന ബാങ്കുകള്‍ക്ക് നന്ദി.

പഠനോല്‍സവം 2019

പൊയ്‌ക ഗവ ഹൈസ്‌കൂളിലെ പഠനോല്‍സവം 2019 ഫെബ്രുവരി 14ന് രാവിലെ പത്ത് മണിക്ക് സ്‌കൂള്‍ ഓഡിറ്റോറിയത്തില്‍ കോതമംഗലം ബി പി ഒ ശ്രീ എസ് എം അലിയാല്‍ സാറിന്റെ സാന്നിധ്യത്തില്‍ നാലാം ക്ലാസ് വിദ്യാര്‍ഥിനി കുമാരി കൃഷ്‌ണേന്ദു കെ എസ് ഭദ്രദീപം കൊളുത്തി ഉദ്ഘാടനം ചെയ്‌തു. പി ടി എ പ്രസിഡന്റ് ശ്രീ കെ എം ഹസൈനാറിന്റെ അധ്യക്ഷതയില്‍ ചേര്‍ന്ന യോഗത്തില്‍ പ്രധാനാധ്യാപകന്‍ ശ്രീ സുജിത്ത് എസ് സ്വാഗതവും ശ്രീ അജിത്ത് ഇ കെ നന്ദിയും പറഞ്ഞു. പഠനോല്‍സവത്തിന്റെ ഉദ്ദേശവും ലക്ഷ്യവും ശ്രീ ബിനുകുമാര്‍ എസ് വിശദീകരിച്ചു. ര്കഷകര്‍ത്താക്കളായ ശ്രീ ബിജു തോമസ്, ശ്രീ എ ബി ശിവന്‍, ശ്രീമതി സിന്ധു എന്‍ കെ , സ്റ്റാഫ് സെക്രട്ടറി ശ്രീമതി സുഷമ കെ എന്നിവര്‍ ആസംസകള്‍ അറിയിച്ചു.

പഠനോല്‍സവത്തിന്റെ ഭാഗമായി 1,2 ക്ലാസുകളിലെ വിദ്യാര്‍ഥികള്‍ വൈവിധ്യമാര്‍ന്ന വിഷയങ്ങളുമായി ബന്ധപ്പെട്ട സ്റ്റാളുകള്‍ തയ്യാറാക്കി. സോഷ്യല്‍ സയന്‍സിന്റെ ഭാഗമായി ചാര്‍ട്ടുകളും പതിപ്പുകളും പുരാവസ്തുക്കളുടെ പ്രദര്‍ശനവും ശേകരണങ്ങളും തയ്യാറാക്കിയിരുന്നു.

സയന്‍സ് കോര്‍ണറിന്റെ ഭാഗമായി സംയോജിത കൃഷ്ിയുമായി ബന്ധപ്പെട്ട സ്ററില്‍ മോഡല്‍, ചാര്‍ട്ടുകള്‍ പതിപ്പുകള്‍ എന്നിവക്ക് പുറമേ ഭക്ഷണശീലത്തെക്കുറിച്ച് ബോധവല്‍ക്കരണത്തിന്റെ ഭാഗമായി ഭക്ഷണസ്റ്റാളില്‍ ചീര കൊണ്ടുണ്ടാക്കിയ വിവിധ പലഹാരങ്ങള്‍ ചെമ്പരത്തി പൂവില്‍ നിന്നും തയ്യാറാക്കിയ ജ്യൂസ് എന്നിവ ഒരുക്കിയിരുന്നു.

ഗണിതത്തിന്റെ ഭാഗമായി വിവിധക്ലാസുകളിലെ വിദ്യാര്‍ഥികള്‍ തയ്യാറാക്കിയ ചാര്‍ട്ടുകളും പതിപ്പുകള്‍ക്കും പുറമേ വിവിധ ഗണിതരൂപങ്ങളുടെ മാതൃകകള്‍, പസിലുകള്‍ എന്നിവ ഉള്‍പ്പെടുത്തിയിരുന്നു.

ഭാഷാ വിഷയങ്ങളുടെ ഭാഗമായി തയ്യാറാക്കിയ പുസ്തകശേഖരം , ചാര്‍ട്ടുകള്‍, കുട്ടികളുടെ സൃഷ്‌ടികള്‍ എന്നിവ ഇംഗ്ലീഷ് , മലയാളം , ഹിന്ദി ഭാഷകളില്‍ കുട്ടികളുടെ അറിവ് പ്രകടിപ്പിക്കുന്നതിന് ഉതകും വിധമായിരുന്നു.

ക്രാഫ്റ്റിന്റെ ഭാഗമായി തയ്യാറാക്കിയ പേപ്പര്‍ ബാഗുകള്‍, പൂക്കള്‍ , തൊപ്പി , വീടിന്റെ മാതൃക എന്നിവ ഏറെ ആകര്‍ഷകമായിരുന്നു.

ഇതോടൊപ്പം നടന്ന സ്റ്റേജ് പ്രവര്‍ത്തനങ്ങളില്‍ നാലാം ക്ലാസ് വിദ്യാര്‍ഥിയുടെ പ്രസംഗത്തിന് പുറമേ വിവിധ പഠനവിഷയങ്ങളുമായി ബന്ധപ്പെടുത്തി സ്കിറ്റുകളും അവതരിപ്പിച്ചു. ഏഴാം ക്ലാസ് വിദ്യാര്‍ഥികള്‍ ജാലിയന്‍വാലാബാഗുമായി ബന്ധപ്പെട്ട വിഷയം അവതരിപ്പിച്ചപ്പോള്‍ Snake in the Grass , Pied Piper എന്നീ ഇംഗ്ലീഷ് പാഠങ്ങളുമായി ബന്ധപ്പെട്ട് സ്കൂിറ്റുകള്‍ ഇംഗ്ലീഷില്‍ അവതരിപ്പിച്ചത് ഏറെ നന്നായിരുന്നു. വഞ്ചിപ്പാട്ട്, ചീരപ്പാട്ട്, കവിതാലാപനം, വായന് , Conversation, എന്നിങ്ങനെ വ്യത്യസ്തങ്ങളായ പരിപാടികള്‍ക്ക് പുറമേ 4,5,6 ക്ലാസുകളിലെ വിദ്യാര്‍ഥികള്‍ അവതരിപ്പിച്ച Experiments, ഓട്ടന്‍തുള്ളല്‍, കഥാകഥനം, പുസ്കപരിചയം, വിവരണം എന്നിവയും അവതരിപ്പിക്കുകയുണ്ടായി .

മികവ് 2019

      എസ് എസ് എല്‍ സി പരീക്ഷാ ഫലം മെച്ചപ്പെടുത്തുക എന്ന ലക്ഷ്യത്തോടെ എറണാകുളം ഡയറ്റിന്റെ നേതൃത്വത്തില്‍ ജില്ലയിലെ തിരഞ്ഞെടുത്ത വിദ്യാലലങ്ങളില്‍ നടത്തി വന്ന മികവ് 2019 പദ്ധതിയുടെ ഭാഗമായുള്ള രണ്ട് ദിവസത്തെ ക്യാമ്പ് പൊയ്‌ക ഗവ ഹൈസ്കൂളില്‍ നടന്നു. ഡയറ്റ് നല്‍കിയ മൊഡ്യൂള്‍ പ്രകാരം വിവിധ വിഷയങ്ങളിലെ വിദഗ്ധര്‍ പാഠഭാഗങ്ങള്‍ കൈകാര്യം ചെയ്‌തു. രക്ഷകര്‍ത്താക്കള്‍ക്കായി നല്‍കിയ ബോധവല്‍ക്കരണക്ലാസില്‍ പൈമറ്റം സ്കൂളിലെ പ്രധാനാധ്യാപകനും കൗണ്‍സിലറുമായ ശ്രീ വല്‍സലന്‍ സാര്‍ ക്ലാസ് എടുത്തു. വിദ്യാര്‍ഥികളില്‍ ആത്മവിശ്വാസം വര്‍ധിപ്പിക്കുന്നതിനും പഠനത്തില്‍ ഗൗരവം ഉണ്ടാക്കുന്നതിനും ഈ ക്ലാസ് ഏറെ ഗുണപ്രദമായിരുന്നു എന്നതാണ് പൊതുവെയുള്ള വിലയിരുത്തല്‍

നിറവ് 2019- സ്കൂള്‍ വാര്‍ഷികം

             പൊയ്‌ക ഗവ ഹൈസ്ക‌ൂള്‍ വാര്‍ഷികവും 30 വര്‍ഷത്തെ സേവനത്തിന് ശേഷം സര്‍വീസില്‍ നിന്നും വിരമിക്കുന്ന ശ്രീമതി മേരിക്കുട്ടി ടീച്ചറിന്റെ യാത്രയയപ്പും വിപലമായ പരിപാടികളോടെ ആഘോഷിച്ചു. പി ടി എ പ്രസിഡന്റ് ശ്രീ കെ എം ഹസൈനാര്‍ അധ്യക്ഷത വഹിച്ച യോഗത്തില്‍ കുട്ടമ്പുഴ ഗ്രാമ പഞ്ചായത്ത് പ്രസിഡന്റ് ശ്രീമതി സന്ധ്യാ ലാലു പൊതു സമ്മേളനം ഉദ്ഘാടനം ചെയ്‌തു. കോതമംഗലം ബ്ലോക്ക് പഞ്ചായത്ത് വൈസ്‌ പ്രസിഡന്റ് ശ്രീമതി ശാന്തമ്മ പയസ് മുഖ്യാതിഥിയായിരുന്നു. ഗ്രാമ പഞ്ചായത്തംഗവും മുന്‍ പഞ്ചായത്ത് പ്രസിഡന്റുമായ ശ്രീമതി വിജയമ്മ ഗോപി ഡിജിറ്റല്‍ മാഗസിന്‍ 'മിറാഷ്' പ്രകാശനം ചെയ്തതോടൊപ്പം സ്കൂള്‍ ബ്ലോഗിന്റെയും ഉദ്ഘാടനം ചെയ്തു. സ്കൂള്‍ വിക്കിയും യോഗത്തില്‍ പരിചയപ്പെടുത്തി, സ്കൂള്‍ വാര്‍ഷിക റിപ്പോര്‍ട്ട് സീനിയര്‍ അസിസ്റ്റന്റ് ശ്രീമതി ശാന്ത പി അയ്യപ്പന്‍ അവതരിപ്പിച്ചു. സ്കൂള്‍ പ്രധാനാധ്യാപകന്‍ ശ്രീ സുജിത്ത് എസ് സ്വാഗതവും സ്കൂള്‍ ലീഡര്‍ സച്ചു സെല്ലോ നന്ദിയും പ്രകടിപ്പിച്ചു. വിവിധ മേഖലകളില്‍ മികച്ച പ്രകടനം നടത്തിയ വിദ്യാര്‍ഥികളെ ഉപഹാരങ്ങള്‍ നല്‍കി അനുമോദിച്ചു

         30 വര്‍ഷത്തെ വിശിഷ്ട സേവനത്തിന് ശേഷം സര്‍വീസില്‍ നിന്നും വിരമിക്കുന്ന ശ്രീമതി മേരിക്കുട്ടി ജോസഫിന് പി ടി എ കമ്മിറ്റിയുടെ ഉപഹാരം എം പി ടി എ അംഗം ശ്രീമതി ശോഭന വി ജി സമ്മാനിച്ചു. സ്റ്റാഫ് സെക്രട്ടറി ശ്രീമതി സെഷമ കെ ഷാള്‍ അണിയിച്ച് ആദരിച്ചു. ശ്രീമതി മേരിക്കുട്ടി ടീച്ചര്‍ മറുപടി പ്രസംഗം നടത്തി.

        പൊതു സമ്മേളനത്തിന് ശേഷം കുട്ടികളുടെ വര്‍ണാഭമായി കലാപരിപാടികള്‍ നടന്നു. ആഘോഷക്കമ്മിറ്റി കണ്‍വീനര്‍ ശ്രീ ബിനുകുമാര്‍ സാറിന്റെ നേതൃത്വത്തില്‍ നടത്തിയ ആഘോഷപരിപാടികള്‍ മികച്ച നിലവാരം നടത്തി. നേരത്തെ കലോല്‍സവത്തിന് മുന്നോടിയായി വിദ്യാര്‍ഥികളും അധ്യാപകരും  പങ്കെടുത്ത വിളംബരജാഥ നടന്നു. 

ഡിജിറ്റല്‍ മാഗസിന്‍ ഡൗണ്‍ലോഡ് ചെയ്യാന്‍ ഇവിടെ ക്ലിക്ക് ചെയ്യുക 

ഗവ ഹൈസ്‌കൂള്‍ പൊയ്‌കയുടെ വിക്കി പേജ് ഇവിടെ

സംസ്‌കൃതി 2019

              സ്‌പിക്ക് മൈക്ക, കൊച്ചിന്‍ ഷിപ്പ്‌യാര്‍ഡ്, ജില്ലാ ഭരണകൂടം , പൊതുവിദ്യാഭ്യാസ വകുപ്പ് ഇവയുടെ ആഭിമുഖ്യത്തില്‍ ജില്ലയിലെ ഗവ ഹൈസ്‌കൂളുകളില്‍ കേരളത്തിലെ പ്രാചീന കലാരൂപങ്ങളെ പരിചയപ്പെടുത്തുന്നതിനായി നടത്തുന്ന സംസ്‌കൃതി 2019ന്റെ ഭാഗമായി പൊയ്‌ക ഗവ ഹൈസ്‌കൂളില്‍ കൂടിയാട്ടം ഡെമോണ്‍സ്ട്രേഷന്‍ ക്ലാസ് നടന്നു. പ്രശ്സ്ത കൂടിയാട്ടം കലാകാരന്മാരായ ശ്രീമതി കപില വേണു, ശ്രീ സൂരജ് നമ്പ്യാര്‍ എന്നിവരാണ് കൂടിയാട്ടം അവതരിപ്പിച്ചതും അതിന്റെ മുദ്രകളും രീതികളും വിശദീകരിച്ചതും . സ്കൂള്‍ പി ടി എ കമ്മിറ്റി അംഗം ശ്രീ ബിജു തോമസിന്റെ അധ്യക്ഷതയില്‍ ചേര്‍ന്ന യോഗത്തില്‍ പി ടി എ പ്രസിഡന്റ് ശ്രീ കെ എം ഹസൈനാര്‍ കൂടിയാട്ട അവതര​ ഉദ്ഘാടനം ചെയ്‌തു. പ്രധാനാധ്യാപകന്‍ ശ്രീ സുജിത്ത് സ്വാഗതവും സ്കൂള്‍ ലീഡര്‍ മാസ്റ്റര്‍ സച്ചു സെല്ലോ നന്ദിയും പറഞ്ഞു. അധ്യാപകരായ ശ്രീ ബിനുകുമാര്‍ എസ്, ശ്രീ അജിത്ത് ഇ കെ എന്നിവര്‍ കൂടിയാട്ടത്തെക്കുറിച്ച് വിശദീകരിച്ചു. സ്കൂളിന് വേണ്ടി പ്രധാനാധ്യാപകന്‍ കലാകാരന്മാരെ ആദരിച്ചു